நேரிசை வெண்பா
1. கவிஞர் பூங்கா சண்முகம்
செய்யோன் வெயிலொளி மேனியேற்று நீலவானில்
பொய்யொளியால் மெய்ப்புகழ் கொண்டிடினும் - மெய்க்குறை(வு)
எய்தி வளரும் நிலவே வளர்மதியாய்
பொய்வாயில் வீழாது போற்று
2. கவிஞர் ஓசூர் மணிமேகலை
சொல்கின்ற வாக்கினில் சோர்விலா ஆற்றல்தான்
வெல்லும் வழியாம் விரும்பிடு - நல்வழியாம்
மெய்யொன்றே எந்நாளும் மேன்மை யளித்திடும்
பொய்வாயில் வீழாது போற்று
3. கவிஞர் வ.க.கன்னியப்பன்
செய்யும் செயல்களில் செம்மைபல உண்டெனினும்
உய்யும் வழியினுக் குற்றதுணை – மெய்யாக
எய்துசெய்யும் செய்கைகள் எல்லாமும் எஞ்ஞான்றும்
பொய்வாயில் வீழாது போற்று!
4. கவிஞர் பஃக்ருத்தீன் இப்னு ஹம்துன்
புத்தம் புதுமலராய்ப் பூவுலகில் கண்விழிக்கும்
முத்தனைய பிள்ளைக்கு முத்தங்கள் - இத்தரையில்
மெய்யன்பை ஊட்டி வளர்த்தவளை நாளெல்லாம்
பொய்வாயில் வீழாது போற்று.
5. கவிஞர் அபூ முஜாஹித்
தூய்மையினை நெஞ்சிருத்தித் துர்க்குணத்தை விட்டகற்றி
ஆய்ந்தெடுத்த சொல்லை அணிசேர்த்து - வேய்ங்குழலாய்ப்
பொய்கைப் புதுக்காற்றாய்ப் பூமணத்து வாசமாய்ப்
பொய்வாயில் வீழாது போற்று
No comments:
Post a Comment