செங்கதிரே!

பைந்தமிழ்ச் செம்மல் அழகர் சண்முகம்

பொங்கு கடல்குளித்துப் பொன்னில்

முகம்நனைத்(து)

எங்கும் இருள்நீக்க எழும்கதிரே! - செங்குருத்துச்

சூழச் சுடர்விரித்துச் சுற்றும் புவிசெழித்து

வாழ ஒளிநிறைத்து வா!                       1

புவியேட்டில் பொற்கதிர்ப் பூவொளி தூவிக்

கவிவரையும் செவ்வான் கதிரே! - குவிந்தயர்ந்தோர்

வாழ்விலென்றும் நீங்கா வளமோங்கி எண்ணவிருள்

தாழ்வகழப் புத்தொளி தா!                      2

ஓவியச்செவ் வானில் ஒளிக்கதிர்த் தூரிகையால்

காவியம் தீட்டும் கதிரவனே - மேவியநற்

செல்வமெலாம் சேர்ந்து செழுமை செழித்தோங்கிப்

பல்வளமும் பெற்றுயரப் பார்!                   3

கார்கிழித்து வானுதிக்கும் காலை இளங்கதிரே!

ஏர்கிழித்து மண்ணில் எழில்பெருகி - நீர்கிழித்துத்

தாவிக் கயல்பாயும் தானைத் தரணியெங்கும்

ஓவியமாய்த் தாநல் உயர்வு                    4

சோலை மலர்விரிந்து சொக்க மணம்சொரியக்

காலையில் பூக்கும் கதிரவனே! - மூலையில்

தூங்கா(து) உழைப்பவர் தூய வளம்பெருகி

ஓங்கத் தருவாய் ஒளி!                         5

திங்களெழில் கூடித் திகழ ஒளியூட்டித்

தங்க முகம்காட்டும் தாய்க்கதிரே – மங்கலறப்

பாரில் சமத்துவவேர் பல்க வொளிவித்தைத்

தேரில்நீ வந்து தெளி                          6

ஓங்கு புவிவிழிக்க ஓயா மடல்வடித்துப்

பூங்கவிதை பாடிவரும் பொற்கதிரே - தாங்குமுயர்

ஏரெடுத்தோர் வாழ்வில் இடர்அறுந்து சீர்நிலைக்கத்

தாரெனும் பேரொளி தா!                       7

பூவிரிக்கச் சோலை புவிமகிழும் வேளையொளி

பாவிதைத்து நோக்கும் பகலவனே - தீவினையின்

வன்செயல் நீங்கி வளம்பெருகி வையமெலாம்

அன்புநெறி ஓங்க அருள்                       8

வாலை முகவானில் வண்ணக் கதிர்விரித்து

வேலைத் துலக்கியெழும் வெய்யோனே! –

                                    காலைமுதல்

மாலைவரை பாடுபடும் மக்கள் மகிழவொளி

ஓலை விடுத்தின்னல் ஓட்டு                    9

தேயாப் பெருவெளியும் தேடா துடையுடுத்த

ஓயாமல் வேய்தொளிரும் ஒண்கதிரே - சாயா

முறைநிலைத்து மண்ணில் மும்மாரி பெய்து

கறைமறையக் கண்ணொளியைக் காட்டு         10