புரிந்துகொள் தெரிந்துவிடும்

பைந்தமிழ்ச்சுடர் 

அன்னபுத்திரன்

கோடை வெயிலும் கொளுத்துறது

        கொடுமை கனத்தே வருகிறது
வாடை எங்கோ தெரியவில்லை
        வானும் வெளுத்துக் கிடக்கிறது
பாடை போவோர் அதிகரிக்க
         பாவம் என்று யாருரைப்பார்
ஆடை கட்டி அலங்கரித்தால்
          அகலா வழுக்கென்(று) அறிவீரோ!       1

ஆட்டம் போடும் அகிலத்தில்
         அறிவும் மறையும் மானிடத்தில்
கூட்டம் கூட்டிக் கொடுமைகளும்
          கொல்லு முனையும் அறிவாயா?
காட்டு மோர்நாள் கண்டறிவாய்
          காமம் வேண்டா கற்றறிவீர்
ஏட்டில் சுரக்கா யென்றெழுதின்
          ஏற்கா நாவும் சுவையதனை!                2

தேடும் உறவை நல்லொழுக்காய்
         தேவை யறிவின் உனதுள்ளம்
வீடும் போற்றும் வினையகன்றே
          விளங்கு வாய்நீ அதையறிந்து

நாடும் புகழும் நாவடக்கால்
         நலதாய் மகிழ்வாய் நானிலத்தில்
காடும் ஏற்கும் கனிந்துருகி
        கடப்பீர் கனிவாய் வாழ்வதனை!           3

பொறுமை யதனைப் போற்றிமதி
         பொறாமை யுன்னை வீண்செய்யா
வறுமை நிலைதான் வந்தாலும்
         வளமாய் சிறக்கும் வாழ்வியலும்
சிறுமை யென்றே ஏற்றறிவாய்
         சீறும் நாகம் தீண்டாது
உறுதி யுனக்கே நிச்சயிக்கும்
        உறுத்தும் பகைமை மனங்களுக்கு!      4