பைந்தமிழ்ப் பாமணி சரஸ்வதிராசேந்திரன்
கன்னக் குழியழகி காதல் மொழிபேசி
என்னைக் கவர்ந்தாயடி- கிளியே
எனக்குள் கனிந்தாயடி
அள்ளி நிறைந்தொழுகி அன்பினில் நாமும்
துள்ளிக் களிப்போமடி - கிளியே
உள்ளம் கலப்போமடி
கொஞ்சு தமிழில் மழலையாய்ப் பேசுகிறாய்
நெஞ்சு நெகிழுதடி - கிளியே
நித்தம் மகிழுதடி
தென்றலாய் வந்தென்னைத் தீண்டுகிறாய் நாளும்
மன்றம் அழைக்குதடி - கிளியே
மையலும் பெருகுதடி
வண்ணத்துப் பூச்சியாய் வட்ட மடிக்கின்றாய்
எண்ணம் சிலிர்க்குதடி - கிளியே
ஏதேதோ சொல்லுதடி
காதலைப் பாடியே போதையை ஏற்றுகிறாய்
கையில் வருவதெப்போ - கிளியே
கடிமணம் புரிவதெப்போ
No comments:
Post a Comment