பாரதியால் பெற்ற பயன்

கவிஞர் "இளவல்" ஹரிஹரன், மதுரை

வெடிகுண்டு வார்த்தைகள் வீர்யமிகு பாட்டு

படிக்கின்ற பாமரரும் பார்வை - துடிக்கின்ற

வீர விவேகங்கொள் விந்தை யுணர்வெல்லாம்

பாரதியால் பெற்ற பயன்.

அக்கினிப் பார்வைகள் ஆர்ப்பரிக்கும் பாடல்கள்

சொக்கவைக்கும் சுந்தரச் சொற்கள் - திக்கெட்டும்

வீர சுதந்திரம் வேண்டிட வைத்ததே

பாரதியால் பெற்ற பயன்.

தேச விடுதலைக்குத் தேசுகவி யாத்தபடி

வாச மலரென, வாரணமாய் - ஆசுகவி\

பாரதிரப் பாட்டுரைத்துப் பாரதத்தைப் பெற்றோமப்

பாரதியால் பெற்ற பயன்.

நெஞ்சில் துணிவையும் நேர்மைத் திறத்தையும்

அஞ்சா உணர்வும் அளித்தவன் - துஞ்சுமொரு

வீரத்தை வெற்றியை வீறுகொளப் பாடியதே

பாரதியால் பெற்ற பயன்.