மொழி காக்க...இனம் காக்க..!
பாவலர் சொ.சொல்லினியன் சேகர்
மொழிவாழ இனம்வாழ மூத்தோர் சொன்ன
முத்தான கருத்துக்கள் மறைந்தா போகும் ?
அழியாமல் மொழியினத்துக்
காக்கஞ் சேர்க்கும்
அடிப்படைகள் என்னவென்றும் அறிதல் வேண்டும்
தொழிலாக இப்பணியைத் தோள்மேல் போட்டுத்
தொடர்ந்தேநாம் பணியாற்றத் தோல்வி யுண்டோ
விழிநீரால் யாதொன்றும் வாய்த்த தில்லை ;
வரலாற்றில் செயலொன்றே வெற்றி யாகும் !
முறையற்ற மொழிக்கலப்பால் மேன்மை குன்றி
முக்காட்டில் முகம்மறைக்கும் மகளிர் போலக்
கறையோடு தமிழன்னை கலங்கல் கண்டும்
கருத்தின்றி வாழ்ந்திருத்தல் குற்றம் தானே ?
துறைதோறும் புதுச்சொற்கள் தேடிச் சேர்த்துத்
துடிப்போடு கலப்பின்றித் தமிழைக் காக்க
உறைநீங்கும் வாளைப்போல் உறுதி யோடே
உணர்வுபெறும் தமிழரையே உலகம் போற்றும்
இந்நாட்டில் இந்தியராய் இருக்கும் மட்டும்
இனஉணர்வால் தமிழரென இருப்ப தேதாம் ?
அந்தகர்கள் வெங்களிறை அறிதல் போல
அடையாளம் இந்தியத்தால் அழிந்து பட்டோம் !
கந்தகத்தை எரிமலைக்குள் காத்தல் போலக்
காலமெல்லாம் இனவுணர்வைக் காத்தல் செய்து
வந்தனைக்கு மொழி,இனத்தை வரித்துக் கொண்டால் வரலாறே பொன்னெழுத்தால் வாழ்த்திப் பாடும்
No comments:
Post a Comment