9. பைந்தமிழ்ப்பாமணி கவிஞர் ஜெனிஅசோக்
அழிந்தும் அழியொணா தொன்றாம் எழுத்தினா
லழிந்தும் வாழ்ந்திருப்போம்
அழிந்து மறியொணா மாந்தர் படிக்கவே
யனைத்து மெழுதிவைப்போம்
விழுந்தோர் மீண்டெழு வாய்ப்பை யெழுதியே
மீளும் வழிகொடுப்போம்
தழும்பை யனுபவ மாக்கும் வலுவினைத்
தரவே யெழுதுவமே 1
மருட்டும் வார்த்தைகள் மறந்து போகுமே
வடிவம் கொடுப்போமே
கருக்குப் பட்டயம் எழுத்தே அதனைக்
கண்ணாய் மதிப்போமே
அருவம் வாய்மொழி யெழுத்தே முகவரி
அதற்காய் வாழ்வோமே
இருளும் நிலையல பொருளும் நிலையல
எழுத்தா லிணைவோமே 2
பகையைக் கடந்துநல் நட்பை யடைந்துநாம்
பண்பாட் டினைக்காப்போம்
புகையை யெழுப்புவோர் களைத்துப் போம்வரை
பூத்து மணங்கொடுப்போம்
நகைக்கும் நரிகளின் சாயம் கலைக்கவே
நன்றாய் மொழியறிவோம்
திகைக்குஞ் சேதிகள் மொழியைச் சிதைக்கையில்
திறப்பில் நிற்போமே 3
ஓல மடங்கினுஞ் சான்றா மெழுத்தினா
லுண்மை வாழ்வுறுமே
பாலம் போலநாம் கூடி யெழுதுவோம்
பாக்கள் வழிதருமே
காலங் கடப்பினும் வாழும் மரபினால்
காவல் கொடுப்போமே
ஞாலம் நோயினால் வாடிக் கிடப்பினு
மெழுத்தால் எழுவோமே 4
No comments:
Post a Comment